Lo Congrès recrutèt l'equipa de lexicografia amb una perspectiva d'embaucha en genièr de 2024. Se redigèt e se metèt en linha una ofèrta d'emplec, puèi après una primièra seleccion de las candidaturas, se faguèron los entretens davant una jurada compausada del president del Congrès, del president del Conselh lingüistic, del director e del cap de projècte. La seleccion finala se faguèt en foncion dels perfils, de lors competéncias lingüisticas e de lors complementaritats, amb lo suènh d'assegurar la cobèrta mai larga possibla de la diversitat, e 3 personas foguèron recrutadas, formant amb lo cap de projècte una equipa totala de 4 personas entièrament dedicada (cal ajustar l'equipa de permanent del Congrès que vendràn en supòrt) al projècte de Diccionari general informatizat de la lenga occitana.

En seguida de las operacions de recrutament menadas en novembre e decembre de 2023, l'equipa de lexicografia, compausada dels 3 lexicografs recrutats e del cap de projècte e apiejats per la cap del pòl informatic, se retrobèron pendent un seminari d'integracion a Pau los 8 e 9 de genièr de 2024. Lo seminari comencèt per las demarchas administrativas (contractualas e socialas) e la mesa en plaça del pòst de trabalh (remesa dels ordenadors, configuracion de la burotica e dels espleches de trabalh collaboratius) e se perseguiguèt per la presentacion del quasèrn de las cargas, de la metodologia de trabalh, lo contengut dels articles e de l'interfàcia de la plataforma d'edicion de lexic en TEI (text encodage informacion).