Las causidas editorialas e los enjòcs metodologics del DGILO (Diccionari general informatizat de la lenga occitana) son nombroses :

• amassar e valorizar lo còrpus lexicografic e textual, istoric e modèrn ;
• assegurar un tractament de la dialectica descripcion/regulacion comuna a tot trabalh lexicografic ;
• facilitar l'intercompreneson entre las diferentas varietats per la valorizacion dels elements d'unitat de la lenga e l'explicitacion de las particularitats ;
• far de preconizacions sens impausar d'estandardizacion, s'agissent sustot de la lematizacion, de la terminologia e de la neologia ;
• clarificar l'origina e l'identitat de d'unes mots ;
• illustrar en abonde la lenga e contextualizar sa riquesa semantica en partir del còrpus prealablament establit e aprigondit (atestacions istoricas, citacions literàrias e mediaticas, apòrts paremiologics).

Lo primièr trimèstre de l'annada 2024 es estada especificament consacrat :

• a la formacion dels lexicografs relativament al quasèrn de las cargas, a l'estudi de las ressorsas lexicograficas disponiblas e a l'aplicacion TEI, dins la tòca de bastir una cultura editoriala e diccionarica comuna,
• a la conducha d'una fasa tèst dedicada a la redaccion dels cinquanta primièrs articles (l'òrdre causit per la creacion de las dintradas essent l'òrdre alfabetic), • a la constitucion d'un esplech de recèrca lexical (lo “ Cercador “), intèrna al Congrès. L'un dels lexicografs foguèt en carga de seguir sus mantun mes los desvolopaments del prestatari informatic.

A la fin de març, a l’eissida d'aquela fasa :

• mantun emendament al quasèrn de las cargas foguèron someses a l'aprobacion del Conselh scientific a de fins de melhorament o de simplificacion ;
• per assegurar un desvolopament editorial realista e adaptat a la demanda, la basa lexicala identificada foguèt separada en doas partidas :
• los mots d'usatge corrent e comunament atestats dins lo còrpus : aquelas dintradas « prioritàrias » son estudiadas dins lo detalh e constituïsson lo trabalh lexicografic complit dempuèi ;
• los autres mots, mai rars e/o mai especifics a una varietat de la lenga : aqueles mots son regropats dins un fichièr partejat (« l'Apondon ») e son daissats a l'atencion d'un trabalh lexicografic ulterior e complementari.

Al 31 de decembre de 2024, un milièr d'articles foguèt creat, dont mai o mens la mitat amb l'objècte d’una validacion de completud.